🇮🇷#پژوهش_ادملاوند edmolavand
💠فرهنگ_عامه🕊چلچلا
✍چلچلا اتا پرندوئه باریک بال دانّه و ونه دِم دِچلّوئه.
وه لل و دیگه بئوئون ره خانّه و ونه قد سر تا بِن ۱۶ سانتی‌میتر نَوانه.
مازرون مردِم چلچلا ره بهار ِمژده دونّه و ونه بکاشتِن ره نخاش دونّه. چلچلائون مازرون دله سره‌ئون ِبومِ‌سَر یا دیفار دله شه وسّه کالی سازنّه و اوایل بهار تا اواخر پاییز اینجاهان دَرنه. وشون ره وفاداری ِنماد هم دونّه. قدیم مازرون دله گاتنه که چلچلای کَش‌بِن قرآن کَته تا وچون وه ره کار ندارن و اشکار نَواشه.
📝#شعر_مازنی
🕊چلچلا در اشعار:
ته وسه کهنه شو ره تازه کمبه
چشه جا آسمون ره سازه کمبه
#چلچلا بومه پر زمبه ته سرپیش
اره ، مجنون ره ای آواره کمبه
❅𖣔༅═─
🕊مثنوی نوروزِ خون:
نو بهیه سال و ماه، نوروزِ خون
مازِرونِ دل نخاره ای بخون،
باو زمسّون شونه تیتی زنّه دار،
گل در انه رج به رج دشتِ کنار،
مژده هاده سونِ مسِّ #چلچلا
تازه وونه مردمِ کهنه قوا!
اونه ما هسّا ته ونگ و وا
نیه!غرصه داری، دردِ، باری؟ باو چیه،
ترنه وای نوبهارون پس کوبه؟
جانِ دل! نوروزِ سلطون پس کوبه؟
تا نخونی وا نوونه باغِ چش،
زلفه شه گلجارِ دیم نکّاینه خِش!
من ته دردِ آشِنا، نوروزِ خون،
کوکِ داردِن، این بهار طالب بخون!
✍آزاده مهجوریان نماری
𖣔༅═─
دیاری دیاری نزن مه وسّه اشاره
مه دل وونه پاره
مثال #چلچلا شونی
ای انی دباره این دراز راه ره
ونگ بزومه جان خدا هاده راه چاره
ته بوین مه زار ره
گلی بزومه تسّه یار نشنونی صداره
من تنه بلاره
𖣔༅═─
بهار #چلچلا بَیمه پیدا نی
سیو پوش تیکا بَیمه پیدا نی
تا کی ته سر راه ره چش بکشم
اسیر لله وا بیمه پیدا نی
های برو های نشو صبح ستاره
تو شونی غریبی دل بونه پاره
𖣔༅═─
🌹چلچلا نمویی مه حال خرابه
🌹مِه وِسّه دَیّن این دنیا عذابه
🌹#چلچلا بخون تا مه حال بیه جا
🌹ته آواز مثل او مسّه سرابه
✍️داداشی-درازکلا
𖣔༅═─
نلمه مازرون صدا بمیره مه دل ارمونی
آسمون ماه و روجا بمیره مه دل ارمونی
گلی ره سر دما وِ ناله زمه مه دل ارمونی
نلمه کتولی طالبا بمیره مه دل ارمونی
وطن من شه دل ره تنه کوتر سازمه
شه بشکسّه تن ره تنه سنگر سازمه
هفت بند لَله ره آواز دنیه
مازرون بیشه ره ناز دنیه
شه دیار شه مازندرون ِ میرمه
گالش مردی پهلوون میرمه
ککی و بلبل ره غصه ور هایته مه دل ارمونی
امه سامون #چلچلا پر هایته مه دل ارمونی
هلی دار هم دیگه تتی نکنّه مه دل ارمونی
گمون کمّه مه ملک ره غم سر هایته مه دل ارمونی
𖣔༅═─
بهارِ سبزه تا سر زنّه انه
آی ربابه جان ته بلاره
سفری #چلچلا پر زنّه انه
آی ربابه جان ته بلاره
کجه پر بکِشی مه کوه کوتر
آی ربابه جان ته بلاره
ته بئی دلخشی در زنّه انه
آی ربابه جان ته بلاره
مره چو نزن نو به نو نزن
آی ربابه جان ته بلاره
دس بشکن سر بشکن دل رِ لو نزن
آی ربابه جان ته بلاره
ته وسّه بزنم تار و لَله وا
آی ربابه جان ته بلاره
ته مسه بخونّی طالب طالبا
آی ربابه جان ته بلاره
ته گیس مه تار شو ته چش مه لمپا
آی ربابه جان ته بلاره
مه راه ره سو هاکن برسم ته جا
آی ربابه جان ته بلاره
مره چو نزن.......
چش خله بکشیه ته انتظاری
آی ربابه جان ته بلاره
دل خله هاکرده ته بیقراری
آی ربابه جان ته بلاره
شه چش ره پر هاده برس مه یاری
هلا چش ندیمه ته چشِ واری
آی ربابه جان
دس بشکن سر بشکن دل رِ لو نزن
𖣔༅═─
بومه #چلچلا پربزنم پر
دخترخاله تنه بمیرم
خانه دل ره خوامه دربزنم در
دخترخاله تنه بمیرم
دخترخاله تنه بمیرم
سرراه تره بهیرم
𖣔༅═─
آه بهار #چلچلا بیمه نمویی ای دنیا
آخ کوه ابری هوا بیمه نمویی ای دنیا
آخ گتی خومه تومنه لله بووش ای دنیا
بشکسته لله وا بیمو نمویی هی دنیا
آخ آی برو آی نشو ....
𖣔༅═─
نماشون نصفِ شو صبح گمه لیلی چلچلا
اتی ناله هدا سر مدا ککی #چلچلا
عشق گل دارمبه دل بلبل واری چلچلا
سر به کوه بزومه بیمه صحرایی چلچلا
چلچلا ته پر دا ته قشنگ سرِ دا
چلچلا ته پر کو وه مه جان دلبر کو وه
🕊#چلچلا
دَپیته دَر و دَروِن ره میا اَی
بَئیته مَحله ره مه وَنگِ وا اَی
بِهار بیمو مه چِش کِندا بَمونِس
نِموئه مه سَفِری #چِلچِلا ای
✍#خسرو_نورانی_کوتنایی 🍁🍂
𖣔༅═─
#در_فراق_پدر_مادر
یادش بخیرجان پِر و جان مار
تنگ هسه مه دل
تـا دَینـه خِش بِیّـه اَمـه روزگـار
کـو اون روزا پِر و مار دَینه خِنه
وَچـونِ دلِ قــرار دَینـه خِنـه
بَخـون #چلـچلا تـا بَخـونّه بلـبل
اون روزای خشی ره وِنه مِه دل
اون روزایی که داشته بوی بهار
خِنـه پـر بِیّـه از عطـر پِــر و مــار
اَجـل تـا کـه پِـر و مـار ره بَــورده
دیگه خنـه ی دلخشی بَمـرده
عجـب رسمیه ایـن رسـم زمـونه
همه شـونّه فقط دلتنـگی مـونّه
اِسـا بـی سِک و سـو بَیّـه روزگار
خنه نـا پِـر دَره نـا کـه جـان مار
کجـه بـورم بنـالم تنـگِ مـه دل
حیف پِـر و مـار بُـوردنه زیـر گِل
شه جان پِـر و جان مـار قروون
تـا کـه بَمـردنه بَیمه سر گردون
مــره قــدیـم روزگـــار بَــوِسّــه
نـوازشِ مـه جـان مار بَوِسّـه
پِـر و مـار کـه بُـورن خنـه خـرابه
دیگـه اون خنه دلخشـی سَرابه
پِـر مثل اِفتاب و مار مثل ماهه
بـی وِشـون عمـر روزگـار کـوتاهه
این دنیا گرچه«مداح»یک محکه
زنـدگـی بـی پِــر و مـار بـی نمکه
🖊#علی_اکبراسفندیار_مداح
𖣔༅═─
📝 شعر تبری مشتلق_چی :
مشتلق چی دارنه پیغوم بهار
دنه مشلق که درانه جان یار
سوروسات نوروزی بونه ب پا
هف سین سفره ره چینده م ننا
هلی تی تی زنده بونه اسب پوش
ککی هم ایندار اوندار کنده سروش
بهار نارنج بو، پیچنه، باغ
دواره بلبل انه گل سراغ
بوی نعناع و اوجی و اوتره
پیچنه باز باغ و لتکای دله
ورف شونه کله باز پر پر او
ونوشه النه ش سر تاج کهو
گل نرگس گل یاس و یاسمن
رقصنه همراه سبزه و چمن
انه #چلچلا دواره ش کلی
گل دور گردنه بازم پاپلی
بلوره گرنه ش دوش مشتی برار
تاکه مرز بیره دواره تیم جار
اتاور گالش ونگ و های وهو
گت و خورد راه کفنه تا بورن کو
دشت و صحرا ره ویندِ هلاله جار
یاد ایارنه ش شهیدون دیار
✍#غفوری
𖣔༅═─
اون روزی که دلبرزنگ بزومه ور
خسه #چلچلا دلبر
بته تنهاهسمه بووش مه دلبر
خسه چلچلا دلبر
دلبرتره یاده بیه بهار ماه
خسه چلچلا دلبر
ونوشه پربیه جنگل و صحرا
خسه چلچلا دلبر
𖣔༅═─
#چلچلا صحرا بی ته سوت و کوره
بزن ناله می حال خیلی ناجوره
🕊#چلچلا
─═༅𖣔❅ ⃟ ⃟ ﷽ ⃟ ⃟ ❅𖣔༅═─
📑#پژوهش_ادملاوند
@edmolavand
📚#آوات_قلمܐܡܝܕ
📡✦࿐჻ᭂ🇮🇷࿐჻𖣔༅═─
📚پژوهشگر اسناد خطی، تبارشناسی و فرهنگ عامه، شاعر و سخنران، مدیر پژوهش ادملاوند و آوات قلم