پژوهشگر محسن داداش پور باکر

📜 شعر کیجا و ریکا

⭐️ قسمت سوم ⭐️

:3⃣
#پژوهش_تبارشناسی_اِدمُلّاوَند
@edmolavand ﷽
⭐️ قسمت سوم ⭐️

کیجا ریکا نکنین
ریکا کیجا نکنین
اما ریکامی چی کمّی؟
تش کمّی یا پی کمّی؟
مارِه پلا هی کمّی؟
شونه وِنه می کمّی؟
وه ره دم و دی دمی؟
یا دلْ نِمِه یی دمی؟
وه سفره ره کمّی پن؟
وه قندون کمّی قن؟
وه دس را مالش دمی؟
وه ره نواجش دمی؟
وه دوش وبالّه گیرمی؟
وه واش نالّه گیرمی؟
وه باغه سبزی کارمی؟
یا وِسِه غرصه دارمی؟
هَینه امه حال و کار
بی خور از پر و مار
مار خنه تنیا نیشته
با تیسا پلا نیشته
چش ونه سوی درّه
نوینّه شه پسرّه
دل وِنه مَشته گره
سینه ونه گب پره
پیر بوه ئه جان مار
نانّه شوئه یا ناهار
نانّه وه گاز روشنه
در کلی کنّه شونه
شه جربه دوجنه
پلای بن سوجنه
شه کاره شه رسنّه
خِرشّه شه پجنّه
شه دونه ره وجینّه
تا نماشون تجنّه
پِر که خدای کار وه
جان خدا وه یار وه
اسا ول و ویل بوه
وه دسّ و په نیل بوه
نونِه شه دل گب ره
خارنه فقط شه حب ره
نیشِنه ایوون سر
نوه وِنه دور و ور
بانوی بو دنیئه
چش ونه سو دنیئه
غرصه ونه نو وونه
غمدار بانو وونه
دس اِلِنه ناک بن
وینه شه ره خاک بن
بانو ره اورنه نظر
کنّه قدیما سفر
کاش گنه من بَمِردام
تنیا یی من دنیوام
درد نیارم شه کتار
قصه درازه برار
هینه امه حال و کار
گرچه ووئیم ده برار
کیجا ریکا نکنّیم
ریکا کیجا نکنّیم
شکر خدا هاکنین
چکه سما هاکنین
شکر خدا کیجائه
اسبه و مثل ماهه
دایْره و دف بزنین
چکّه و کف بزنین
کوچه ره او بشنّین
قرمز جل دونّین
بزنّین و بخونّین
بخونّین و برقصین
سکه و پول بریزین
از خشالی بخنّین
خوایْنی بوئم شما ره
خاصیت کیحاره
کیجا ناز و بلائه
کیجا شمش طلائه
کیجا مرهم درده
کیجا همدم مرده
کیجا گنّم خوشه
کیجا دسّه ونوشه
کیجا صنّخ رازه
کیجا مشمل بازه
کیجا ئه که دارنه ناز
شه پَره هَی دارنه باز
تا نپّره ته کشه
دل تنه وِسه غشه
شبنم و شه ئه دتر
خش بک و به ئه دتر
کیجا پر از شکرّه
خش قدم و نظرّه
کیجا پره ناز کنّه
پر وه دیمه گازکنه
پرِنّه پره کشه
پر کوه آرامشه
پر که ائنه نال سر
واش وه دوش و بال سر
بخاری په شونه
نیمه نیمه له شونه
شونه وه دوشه گیرنه
لینگ کلوشه گیرنه
وِسه سرین النّه
چایی شیرین النّه
شونه ماره سر زنّه
دس وه دیم و سر زنّه
ماره چایی دم کنّه
دوشِ باره کم کنّه
گب شه مار ور زّنه
مارخشالی پر زنّه
کیجا قشنگه خیلی
کیجا ملنگه خیلی
کیجا بهاره وشکو
مشت تتی مشت بو
کیجا داری کمایی
محله ی کدخدایی
کیجا داری همایی
لال مه زوون خدایی
دور وونه ته جا لعنت
ری کنّه ته سه برکت
بوی کیجا پیجنه
برکته هَی ریزنه
هرجا که کیجا مشته
خرمی گیرنه دشته
زندگی عالی وونه
خنه خشالی وونه
خنه خوانی سو داره
کیجائون بو داره
دتر خشی ره اورنه
غرصه و غم ره شورنه
دتر ونه یل ووئه
خنه، مجلل ووئه
دتر ونه ماه ووئه
تا ونه پر شاه ووئه
اگر کیجا دارنی
سرور و سردارنی
ریکا داری هسّی شاه
کیجا داری پادشاه
پس خاره، کیجا دارین
شه سره بالا دارین
هَینم دارین یادگار
بوته ی مه جان مار
دتر ونه هشت تاوو
خنه دکنی مشت بوو

🔵 پایان 🔵

📚#شاعر_علی_ریاحی_کجور
─═༅𖣔❅ ⃟ ⃟ 📚 ⃟ ⃟ ❅𖣔༅═─
#پژوهش_تبارشناسی_اِدمُلّاوَند
@edmolavand ﷽
📡✦‎‌‌‌࿐჻ᭂ🇮🇷࿐჻𖣔༅═─
#آوات_قلم

http://mohsendadashpour2021.blogfa.com
📡✦‎‌‌‌࿐჻ᭂ🇮🇷࿐჻𖣔༅═─